18/2/2012

عارف يا أنتكة أكتر حاجة بحبها فيك إيه؟

إنك " زي ابني" .. مش ابني فعلاً :)

يعني إنك بتتصرف زي ابني، زي ما تكون حتة مني، رغم إنك مش كده!

يعني انت بتحبني فعلاً، مش بتبان بتحبني لأن دي حاجة غريزية أوخارجة عن إرادتك :)

بحبك لأنك بتحسسني إني "روح حلوة" .. لأن مافيش أي حاجة تخليك تقرب لي غير إحساسك بروحي..

إحساسك بإنك مش مصدق إني هأذيك - حتى لو اتظاهرت بالعكس - وإحساسك بإنك حابب تكون معايا، رغم إنك حر في إنك تعمل العكس ..

أنتكة .. أنا اكتشفت إني بغير عليك ! 

قصة حياة أنتكة :)

أنتكة قط شوارع شاءت الأقدار إنه يتولد في بيتنا ... كان أخوه أول قط بعين زرقا أقابله في حياتي فحبيتهم كلهم

للأسف كل اخواته ضاعوا وفضل هو وحيد شريد في بيتنا .. بيخاف من البني آدمين عشان شردوا اخواته 

ما اعرفش إمتى حبينا بعض ولا إمتى أخد عليا ولا امتى اتعلقت بيه بجنون لدرجة اني أعمل له مدونة !!!

طبعاً هو تربية إيدي لذا فهو أنتكة ! 

بيقرف من أي حاجة وبيخاف من كل حاجة عشان كده بردو  أحياناً بسميه " توتر " 

كتير جداً بشك إنه مش قط ! مافيش أي حاجة من اللي القطط بتعملها بيعملها غير إنه بياكل سمك ويشرب لبن وكده !

ونظراً لأنه بقى حاجة حلوة أوي في حياتي .. وسبب قوي في إن معنوياتي تبقى في السما 

قررت أعمل المدونة دي عشان كل ما أحس إني محتاجة " صدق " وفرحة من القلب أدخل هنا وافتكر أيامنا سوا :)